التــايــه
شعر: غازي بن عالي الشمري
التايه اللي تاه في سرمد الليل
أمانتك يانجم بالوصف هب لي
ابتقدى واخذ الوقت واميل
للعزله اللي من زمن تنتصب لي
مملي شقى والضيق زوّد بي الويل
ماشفت نجمه باللقى تنجذب لي
مروا طواريش العرب في تساهيل
وانا المتاهه في دهاليز سُبلي
سكة سفر هدت من آمالي الحيل
ماظنتي مرّت على إنسان قبلي
في صومعة فكري شعور ومواويل
أحبار في دير السهر ترتقب لي
هم سابقين العهد الاول وهالجيل
بأسبابهم أصبحت بالحيل مبلي
أتوه في ليل الدجى دون قنديل
ديجوري الكامت سدل وانسكب لي
لو جب حظي بين فرصه وتأويل
يمكن يبين النور وامد حبلي
بس ارتقب لي لا تزيد البهاذيل
لو مرةٍ وحده تجمل وطب لي