عيد الحب
شعر: عبدالله الحرابي
عشاق تهدي عيدها وردة الحب
وانته هديت القلب ميلاد جرمك
ذكرى تعيد الوقت ومسلسل الدرب
شريط ذاكرتك تفاصيل حلمك
تنعاد نفس السالفة واحرق القلب
وابكي على الأطلال مقهور ظلمك
ماعاد ترهبني على الشوف واهرب
عادي من المليون ايمر رسمك
ماعاد لي خاطر أجادل واعتب
شربتني م الحب فناجين سمك
مابي هدايا العيد واعيش أتعب
أحرقت كل ذكرى تجي طيف همك
كأنك نسيت الجرح لازال ملهب
مافاد به تضميد ولا فاد سلمك
ولا عاد تعزفني لحونك واطرب
صوت الغريم اللي جروحه بسهمك
تبكيني قيفان الصدر كيف تحطب
في قلب كم اغلاك وياكم ضمك
سنين وانته في شقايه وتلعب
كرهتني حتى نطق حرف إسمك
تعال خذ اللي بقى لك واغرب
من الرسايل ومابقى بعض ختمك
ماعاد أمني خاطري بشوف عقرب
ولا عاد قلبي ينبض بروح دمك